O Partido Socialista de Marín segue crendo na posibilidade de sacar adiante a súa moción sobre o fomento do aluguer na vila, co obxectivo de frear a perda de poboación. Todo iso a pesar de que dita iniciativa foi rexeitada en Pleno municipal do pasado xoves, xa que a representación do Partido Popular no mesmo votou na súa contra.
A medida pretende limitar o prezo do aluguer
Aínda así, o portavoz socialista, Manuel Pazos comentou a través dun comunicado que desde o partido ven posible que a iniciativa acabe saíndo adiante e aseguran que os populares non achegaron argumentos suficientemente convincentes. "O PP impediu a aprobación desta medida sen ofrecer ningunha outra solución ou alternativa para frear o problema do despoboamento e de escaseza de vivenda tanto para compra como para aluguer. Os motivos ofrecidos son a imposibilidade económica do Concello para facerse cargo da mesma e que non son partidarios de establecer un valor máximo no prezo do aluguer. Os socialistas cremos que o Concello si que ten a capacidade económica suficiente para levar a cabo a medida, e que ademais é positiva para os propietarios, para os inquilinos e que é totalmente voluntaria".
Pazos comentou que foi o propio Partido Popular quen falou da posibilidade de seguir estudando o tema. Por iso, desde o seu partido agárranse a esa disposición de seguir traballando porque cremos que as medidas que son positivas para Marín deben de ser apoiadas por todos os grupos políticos, independentemente de quen as propoña", afirmou o socialista.
A medida de fomento do aluguer en Marín custaría, segundo Manuel Pazos, entre 60.000 e 70.000 euros anuais.
