O incendio provocado este xoves por un raio na Illa de Ons, integrada no Parque Nacional Marítimo Terrestre das Illas Atlánticas, deuse por estabilizado ao redor da medianoite, tras arrasar nas primeiras horas unhas 4 hectáreas de monte raso, segundo as primeiras medicións provisionais.
Os datos comunicados pola Consellería de Medio Rural apuntan a que o incendio se iniciou pouco antes das 17.00 horas, tras o que se mobilizaron para a súa extinción dous axentes forestais, catro brigadas e unha motobomba.
A hipótese principal é que este lume foi causado por un raio, xa que as tormentas afectaron na tarde deste xoves á comunidade, con especial intensidade na zona sur.
O alcalde de Bueu, Félix Juncal, trasladou a Europa Press que se lle notificou a mobilización de medios humanos e unha motobomba mediante barcos que saíron das localidades pontevedresas de Cangas, O Grove e Vilagarcía.
OS MEDIOS "TARDARON EN CHEGAR". Entre tanto, os veciños que residen na illa axudaron con cubos e os medios dos que dispuñan na extinción do incendio. Segundo trasladou a Europa Press a portavoz da Asociación de Veciños e Amigos das Illas Ons, María José Pérez Piñeiro, os medios "tardaron en chegar".
"Ninguén contaba coa tormenta, pero pasara unha hora e estaban tres brigadistas", lamentou, á vez que lembrou que durante o verán permaneceu un retén contraincendios de garda na illa, pero retirouse a semana pasada.
MÁIS RAIOS. Os raios tamén provocaron outro conato de incendio en Sanxenxo, na parroquia de Dorrón, que se atallou de inmediato.
Así mesmo, un raio é a causa máis probable dun incendio rexistrado no Monte Pedroso, en Santiago. Fontes de Medio Rural indicaron que este lume, xa extinguido, afectou a 0,06 hectáreas de monte arboledo.
