A Xunta completa este sábado o traslado de persoas maiores usuarias das residencias DomusVi de Barreiro, en Vigo, e DomusVi de Aldán, en Cangas, de regreso ás mesmas. Permanecían nas instalacións da residencia de tempo libre de Patos, en Nigrán, nove usuarios do centro vigués e 10 do de Aldán, que foran trasladados tras rexistrarse varios casos de coronavirus nas súas instalacións de orixe e comprobarse que non estaban infectados.
Durante a pandemia interviñéronse tres residencias en Galicia. Precisamente, dúas delas foron as instalacións de DomusVi en Aldán e Barreiro, mentres o terceiro centro foi o xeriátrico Nosa Señora de Fátima, situado no Barco de Valdeorras.
