sábado. 08.05.2021 |
El tiempo
sábado. 08.05.2021
El tiempo

Revivindo a historia do cine en Bueu a través das novas xeracións

Mariña Torres, Uxía Torres, Aroa Taeger y Emma Regueira junto a Celia en el rodaje en Seixo este domingo. RAFA FARIÑA
Mariña Torres, Uxía Torres, Aroa Taeger e Emma Regueira xunto a Celia na rodaxe en Seixo este domingo. RAFA FARIÑA
As participantes do Obradoiro Infantil do FICBueu preparan o seu curto documental sobre a historia do cine na localidade budetense

Aroa Taeger, Emma Regueira, Mariña Torres e Uxía Torres teñen entre once e doce anos e atópanse xa detrás de cámara reescribindo a historia dos cines que nunca puideron chegar a pisar. Estas novas cineastas forman parte do Obradoiro Infantil de Cinema que cada ano organiza o FICBueu e preparan xa a súa curta documental para estrear na décimo cuarta edición do festival, o próximo mes de setembro.

Entre testemuños e recordos daqueles que os gozaron, Aroa, Emma, Mariña e Uxía tratarán de imaxinarse a experiencia daqueles que, coa súa idade, tiñan a oportunidade de gozar dos pequenos cines da localidade, agora desaparecidos.

Pouco queda xa daquelas salas que un día achegaron o mundo cinematográfico aos veciños da vila a tan só un paso. Agora, os cines Vitoria, Avenida e Imperial son tan só un recordo daqueles que tiveron a sorte de gozalos. Revivir a súa historia en pleno século XXI e tras varias décadas no esquecemento é o obxectivo principal deste curto documental, que entra na súa recta final coas últimas sesións de rodaxe antes de dar comezo á montaxe o próximo mes de xuño.

UN RECORDO. Os ollos e recordos como os de Celia, muller do antigo propietario dos cines Vitoria e Avenida, serán o fío condutor do curto, que rodou este domingo o seu testemuño na sala do Cine de Seixo, o único destas características que queda agora na comarca.

Esta pequena sala con capacidade para 200 persoas, sobreviviu aos videoclubs, a chegada dos grandes cines e as plataformas dixitais e tamén á pandemia.

O negocio familiar comeza agora a arrincar "un pouco" tras os duros meses de 2020, sinala Ana Carballo, filla do propietario do cine, Perfecto Carballo, e que converte agora a súa sala no escenario perfecto para relatar a historia daquela época na que un cine como o da parroquia marinense era un enclave máis na localidade e non unha pequena xoia en perigo de extinción.

A familia Carballo, propietaria dos cines Victoria e Avenida durante os últimos anos da súa existencia, formará parte desta curta documental, que tratará de revivir a súa historia a través, precisamente, da gran pantalla do FICBueu.

"Sempre me gustou o cine e esta oportunidade para ofrecer algo co que a xente goce é moi bonito", explica Emma, que triplica este ano no taller xunto a Aroa. A pandemia pasou factura a esta actividade anual do festival budetense, que conta cun único grupo na sección infantil, impartida por María Ruíz-Falcó e Nerea Lores, do FICBueu

En xuño darán comezo á edición e montaxe do material, que revisan nas xornadas dos martes e que continuarán gravando nas próximas semanas. A obra completa, baixo o mando destas catro novos cineastas, poderase gozar en setembro, na nova edición do festival.

Revivindo a historia do cine en Bueu a través das novas xeracións
comentarios
ç