O comité clínico de expertos que fai seguimento e evolución do covid-19 en Galicia acordou incluír a Moaña entre os concellos con máximas restricións, tales como a clausura da hostalería e o peche perimetral, que non se fará conxunto con Cangas.
Por outra banda, decidiu suavizar as medidas en Campo Lameiro, Monforte, Verín, Amoeiro, Coles, Trazo, Boqueixón e Val do Dubra. Nestes concellos rexerán as medidas de nivel 2.
Esta son as principais decisións adoptadas tras a reunión mantida este martes polo conselleiro, Julio García Comesaña, xunto aos expertos que conforman o mencionado órgano.
Aparte, nas localidades de Ribeira, Petín, A Rúa, Dumbría e A Lama haberá unha "observación específica" das súas respectivas evolucións epidemiolóxicas.
Todas estas medidas serán publicadas este mércores no Diario Oficial de Galicia (DOG) e entrarán en vigor a partir da medianoite.