Un comercio estable e de calidade. Que se implique no futuro da vila de Marín. Iso é o que algúns comerciantes das rúas Sol e Real desexan para o Casco Vello e, por extensión, a toda a vila marinense.
Desde que o pasado xoves se puxese en marcha a ampliación da feira, os comerciantes viron como hai moito máis movemento nestas dúas rúas, pero se preguntan se realmente isto é o que se merece Marín.
Algúns propietarios de establecementos que levan moitos anos traballando nestas rúas consideran que o mellor sería potenciar a apertura de comercios nestas e outras áreas da zona vella, onde hai multitude de baixos comerciais baleiros. Cren que un comercio estable e de calidade atraería a moita máis xente á vila que un simple mercadillo de xoves, "no que se ofrecen produtos de baixa calidade a un baixo custo, sen ter moi clara a súa procedencia e sen ningún tipo de garantías", relata un dos comerciantes.
Logo de máis de 40 anos celebrando o mercadillo en Serafín Tubío o 67,77% dos baixos están pechados
Ademais, pon datos e datas sobre a mesa. "Logo de máis de 40 anos celebrando o mercadillo nas rúas Serafín Tubío e Augusto Miranda están pechados o 67,7 por cento dos baixos, unha cifra só superada por algunha rúa onde están case o 90 por cento".
CONTENTOS. Outros comerciantes, con todo, móstranse satisfeitos coa chegada dos postos as rúas Sol e Real, pois aseguran que ao haber máis movemento de xente nos seus establecementos tamén entra máis clientela.
"Eu era unha das que me opuña a que a feira se trouxese a estas rúas e, de momento, estou contenta. Tanto o pasado xoves como hoxe (por este xoves) tiven máis movemento", indica unha comerciante.
Os que si están a notar moito o tirón son os establecementos de hostalería, que ademais de atender ás persoas que se achegan a comprar aos postos da feira tamén atenden as necesidades dos propios vendedores ambulantes.
A ampliación do mercado conta con 17 novos postos que se sortearon o mes pasado ante a presenza da Policía Local e Nacional, que tivo que salvagardar o desenvolvemento do proceso tras os disturbios ocorridos nas inmediacións do Concello.