A Comisión de Industria, Turismo e Comercio do Senado de España aprobou este xoves urxir ao Goberno o establecemento dun Proxecto Estratéxico para a Recuperación e Transformación Económica (Perte) para a industria naval, que agora será derivado ao Goberno para a súa aplicación, co obxectivo de facelo ao longo do 2021.
O acordo adoptouse por maioría dos principais grupos, grazas a unha iniciativa de consenso proposta e negociada polo senador pontevedrés do PP Javier Guerra, que logrou introducir o compromiso de que o Perte sexa posto en marcha este mesmo ano, algo que aceptou finalmente tamén o PSOE, e que ademais sexa considerado polo Goberno como un proxecto "de máximo interese".
Este plan estratéxico foi subscrito por 15 estaleiros, dos que oito son galegos -entre eles o de Marín-, así como por máis de 60 empresas auxiliares, ademais de socios tecnolóxicos e institucións de investigación.
O Perte forman parte das manifestacións de interese que o Goberno de España expón á Unión Europea dentro do Plan de Recuperación, Transformación e Resiliencia. O obxectivo destas iniciativas é identificar as áreas de interese e impulsar proxectos tractores de competitividade e sustentabilidade industrial.
A industria naval da provincia de Pontevedra rexistrou caídas do 26% en emprego e do 20% en facturación durante o 2020
No caso concreto do Perte do naval, contémplanse seis liñas tractoras con 21 iniciativas e máis de 90 proxectos que se desenvolverán no período 2021-2026. A súa posta en marcha suporía un aumento do 6% nas cifras de negocio do sector, unha mellora da competitividade de ao redor dun 20% e un peso no PIB duns 3.000 millóns de euros. Isto permitiría crear uns 1.700 postos de traballo.
MENOS FACTURACIÓN. Este Proxecto Estratéxico para a Recuperación e Transformación Económica será fundamental para emendar os danos causados pola pandemia da covid-19 ao sector do naval. A dificultade para pechar novos contratos ou a imposibilidade de asistir a feiras internacionais para promocionar a capacidade da industria tiveron como consecuencia, segundo Asime, a caída dun 20% na facturación do sector naval na provincia de Pontevedra. Ademais, o estaleiro de Marín e o de Vigo, en conxunto, rexistraron un descenso do 26% en emprego, quedándose en 4.600 postos de traballo tras perder preto de 1.200.
Neste contexto, Asime chama a seguir potenciando a reparación naval, unha actividade menos cíclica que a construción, e a apoiar un sector que foi tractor na economía galega desde hai décadas.
Con respecto á carteira de pedidos, os estaleiros galegos só pecharon tres novos contratos no 2020, segundo o informe sectorial do Ministerio de Industria correspondente ao mes de xaneiro.
