A cantautora coruñesa María Xosé Silvar, máis coñecida como Sés, e o dúo TéCanela, formado por Ariadna Rubio e Jano Fernández, abrirán este martes, con senllos concertos, as seis xornadas nocturnas do festival Sorrías Baixas 2021, que se celebra no Recinto Multiusos da Estacada de Bueu.
No cartel do festival, un dos eventos sostibles do FEST Galicia, inclúese a única cita de gran formato deste verán en territorio galego de MC Kase. O, que celebra o décimo aniversario do seu proxecto Jazz Magnetism.
La M.O.D.A., La Pegatina, Travis Birds, Mordo, Sabela, ISEO & Dodosound, Ciudad Jara, Tu Otra Bonita e SonDaRúa completan o cartel deste 2021, con dous concertos cada día que comezarán ás nove e ás dez e media da noite.
As entradas para os directos da M.O.D.A e Sabela (venres, 6) e de Kase.O e SonDaRúa (sábado, 7) están esgotadas desde hai días, pero aínda quedan localidades para a sesión inaugural do martes, do mesmo xeito que para as xornadas do mércores, 4 (Ciudad Jara y Tu Otra Bonita) e do xoves 5 (Travis Birds e Iseo & Dodosound).
Con Bueu en nivel alto de restricións faise necesario unha especial precaución para que o público poida gozar con seguridade do festival
O Recinto Multiusos da Estacada en Bueu estará dividido en catro sectores con capacidade para un máximo de 500 persoas como parte dun protocolo covid-19 propio coordinado polo Servizo Galego de Saúde (Sergas).
Con Bueu en nivel alto de restricións faise necesario unha especial precaución para que o público poida gozar con seguridade do festival, de modo que cada un dos catro sectores contará con equipamentos independentes: aseos, barra, zona de recarga e punto de mercadotecnia.
Esta mañá de luns, a conselleira de Medio Ambiente, Territorio e Vivenda, Ángeles Vázquez, visitou xunto ao alcalde de Bueu, Félix Rodríguez, os traballos de montaxe do escenario Xacobeo 21-22 e do dispositivo ambiental do festival como parte do programa FEST Galicia.
