Coa chegada do verán, os socorristas empezan a desempeñar os seus labores de salvamento e vixilancia nas praias. Por esta razón, esta semana tiveron lugar as primeiras probas de selección para a tempada de verán 2019. O obxectivo era contratar aos oito socorristas con maior puntuación. Se o tempo o permite, estímase que a próxima semana os socorristas ocuparán xa os seus postos nos areais.
As seguintes probas celebraranse a próxima semana, unha vez que se publicou este xoves no Boletín Oficial da Provincia de Pontevedra a convocatoria. As bases publicadas regulan, entre outros aspectos, o sistema de selección e o soldo a percibir que será de 1.511,28 euros ao mes.
Ademais, para que os aspirantes se poidan presentar ás probas, deben cumprir previamente uns requisitos que poderán consultar nas bases que establece o Boletín. Tamén deberán presentar unha solicitude por escrito no prazo de 5 días hábiles, contados desde onte, día de publicación das bases.
Un total de 25 persoas, entre as que se inclúe un coordinador, tres patróns de embarcacións e 13 socorristas, velarán pola seguridade das praias de Portocelo, Mogor, Aguete, Loira e O Santo. Todas estas praias ondean a bandeira azul.
Nos próximos días coñeceranse os resultados para que os seleccionados poidan organizarse e dar inicio a unha nova tempada de sol e praia.
