Os Bombeiros do Morrazo extinguiron as chamas dun incendio rexistrado na cociña dunha vivenda no municipio de Cangas, pero non houbo que lamentar danos persoais.
Segundo informou o 112, sobre as 22.30 horas un particular chamou ao servizo de emerxencias para indicar que vía saír fume dunha vivenda dun edificio fronte á súa casa, situado na Rúa de Ferrol, en Coiro, no termo municipal de Cangas, polo que os xestores de urxencias avisaron aos bombeiros, que saíron de inmediato cara o lugar.
Segundo indicou outro alertante cando tamén chamou ao 112 Galicia para pedir axuda, el atopábase fóra da súa vivenda e precisaba que unha campá extractora podía ser a causa da orixe do lume. Asegurou, ademais, que estaba ben, que non necesitaba asistencia sanitaria.
Aínda así, os profesionais sanitarios derivaron ata o lugar unha ambulancia, por se nalgún momento fose necesario evacuar a algún dos veciños.
Tras finalizar as tarefas de extinción, os bombeiros indicaron que ardeu parte do mobiliario da cociña da vivenda afectada. Ademais do persoal sanitario e dos profesionais de extinción tamén foron informados a Garda Civil, os Bombeiros de Vigo e os efectivos do Servizo Municipal de Protección Civil da localidade.