Destapar os segredos do Manuel Torres é o obxectivo principal da concelleira Itziar Álvarez, que xa traballa na programación cultural deste espazo para o próximo ano. A pandemia cobrouse este 2020 a celebración do esperado Ano Torres, un festexo que pretendía homenaxear ao pintor marinense que lle dá nome a esta sala de exposicións e que conmemoraba o 25 aniversario do seu falecemento.
Con todo, as actividades programadas non quedarán no tinteiro e sairán á luz ao longo do 2021, alargando en 365 días máis a celebración de Torres e coincidindo, casualmente, coa celebración do 120 aniversario do seu nacemento. Así o adiantou Álvarez a este diario, "imos facer dous anos, baixo o hashtag de #ACulturasegue, imos continualo".
O carácter retraído do pintor marinense foi un dos motivos polos que a súa figura non transcendeu en gran medida entre o público xeral, explica. Con todo, a súa arte estúdase nas facultades de Belas Artes e "é unha gran figura do movemento galeguista de Os Novos" altamente coñecida no sector e visitada cada ano por estudantes e artistas.
"O noso obxectivo é dalo a coñecer en Marín tanto como se coñece fóra", destaca Álvarez. "Sempre hai máis de 40 cadros de Manuel Torres expostos de todas as súas diferentes técnicas", e é que destacalo no museo da localidade na que naceu é imprescindible para o Concello.
Os almacéns deste espazo esconden decenas de obras do artista que aínda non viron a luz. Entre eles debuxos ou bosquexos pintados en xornal que deixan albiscar entre trazos rápidos o proceso de creación das propio Torres. "No almacén non están ben os cadros, deben estar fóra", destaca Álvarez. Por iso, o obxectivo do museo agora é tratar de ofrecer novidades cada mes, animando á xente a achegarse a coñecer a historia deste artista e a gozar dos seus diferentes rexistros con obras que non poidan gozar antes e que permitan ao público marinense achegarse un pouco máis á arte de Torres en todas as súas facetas.
"O museo é un lugar seguro", recorda a edil, e insiste en que as súas portas permanecerán abertas durante o tempo que se poida para servir de evasión á veciñanza da localidade durante estes tempos tan difíciles.
A cancelación de diversas actividades con motivo da pandemia é unha situación que "vives con tristeza", destaca a edil, "pero escapa á nosa capacidade de manobra". "Nós estamos abertos, é importante que a cultura siga, pero dentro da solidariedade con outros sectores que están parados".
DECEMBRO. Enmarcado neste afán da concellería para tratar de achegar a figura deste artista aos veciños da súa localidade, o mes de decembro transformará todo o museo para acoller a maior parte posible da obra do pintor.
Ademais, ofrecerá pinturas inéditas, como parte da súa colección de debuxos que non se expón tan a miúdo e novidades como a última obra elaborada polo artista, que se poderá gozar a mediados de mes. Un cadro que pintou durante a pandemia do 1918 e que se atopa nestes momentos en proceso de restauración.
O obxectivo do Ano Torres, que se prolongará durante 2021, é dar a coñecer o museo e a obra do pintor entre os veciños de Marín
FUTURO. Entre os proxectos de futuro, Itziar Álvarez adiantou a este diario que xa se atopan en proceso de negociación con Patrimonio e coa Residencia da Terceira Idade marinense para a doazón dun dos cadros de Torres que agora locen as paredes do centro. O óleo Regateiras poderase gozar polo público que acuda ao museo ao longo do 2021.
Entre as actividades do Ano Torres que non se puideron celebrar, o museo tiña previsto acoller unha serie de conferencias sobre as diferentes técnicas do pintor marinense. Organizadas coa colaboración do artista Antón Sobral, que colabora co Museo en diferentes actividades, verán a luz tamén o próximo ano.
O museo tampouco se esqueceu dos máis pequenos e decidiu crear unha colección de libros de colorear que permiten ás nenas e nenos da vila coñecer a través dos lapis de cores os trazos de artistas marinenses.
Estes exemplares enviaranse aos centros escolares co obxectivo de que os máis pequenos exploren a súa creatividade e o próximo ano ampliará a súa colección cun novo Pinta con dedicado a Manuel Torres.
Álvarez insiste na importancia de dar a coñecer este lugar entre os veciños e sacarlle todo o potencial, "é un reclamo turístico, quero facelo brillar un pouco"máis , sobre todo na vila "porque hai xente que non veu nunca". "Como marinenses, é case unha obrigación vir ao museo", sentencia a edil.
