As asembleas de traballadores do sector dos produtos elaborados do mar celebradas nas distintas empresas aprobaron por aclamación o preacordo de convenio alcanzado o pasado sábado entre os sindicatos e patronal.
A redacción definitiva do documento e a súa firma está prevista para os próximos días, segundo confirmaron fontes sindicais. Un preacordo que contempla unha subida salarial de entre o 16 e 20%, segundo a categoría, e inclúe “boa parte” das melloras sociais que reclamaban as traballadoras.
O convenio terá unha duración de catro anos e contempla novos pluses, redución de xornada, aumento das licenzas ou a regulación da subcontratación ou ETT. “Un avance fundamental na dignificación das condicións laborais destes traballadores”, insistiron desde os sindicatos.
O preacordo alcanzouse tras oito horas de negociación nun encontro que se celebrou en Vigo coa participación da presidenta do Consello Galego de Relacións Laborais. A folga indefinida prevista para este xoves queda desconvocada.
O secretario comarcal da federación en Pontevedra pola CIG, Xabier Aboi, recordou que este preacordo non sería posible “sen a unidade e a determinación mostrada polos empregados deste sector”.
