Final agridoce para os tripulantes do Venturer, o pesqueiro que tivo que atracar no porto da cidade brasileira de Salvador de Bahía o pasado 28 de xaneiro despois de que varios dos membros da tripulación presentasen síntomas compatibles coa covid-19. E é que logo de case un mes, o pesqueiro levou ancoras o martes sen ningún positivo por coronavirus a bordo.
Dos 64 tripulantes (unha decena deles naturais da comarca do Morrazo), polo menos a metade deron positivo por covid-19 nun primeiro momento, o que lles levou a permanecer en corentena a bordo do barco, sen poder partir cara ao caladoiro. Ademais, cinco das persoas positivas tiveron que ser ingresadas na Unidade de Coidados Intensivos da cidade brasileira, entre eles o mariñeiro cangués, que estivo durante 15 días.
Tras unha segunda proba PCR o pasado 10 de febreiro, detectáronse outras nove persoas contaxiadas, o que obrigou ao resto de tripulantes a permanecer no barco dez días máis, ata o pasado venres, cando se realizou unha terceira e última proba PCR, que non arroxou ningún resultado positivo. Este feito foi o que deu a posibilidade ao Venturer de partir o martes cara ao caladoiro das Malvinas para a campaña do calamar máis dun mes logo de saír do Porto de Vigo (fíxoo o día 14 de xaneiro).
Fontes da CIG contan que o día antes de partir, o barco someteuse a unha desinfección "que durou tan só unha hora". O grupo sindical criticou a curta duración dos traballos de limpeza, xa que "se unha casa de catro persoas non a limpas nunha hora, un barco coas dimensión que ten, menos. O normal e que se fixera unha limpeza en condicións xa que alí conviven máis de 60 persoas".
VACUNACIÓN. A pasada semana, o BNG mostrou a súa intención de propor ás administracións iniciativas para esixir a creación dun protocolo claro para os traballadores do sector pesqueiro, xa que na actualidade "hai unha disparidade de criterios e non se está cumprindo a normativa europea en ter un protocolo homologado".
A alarmante cantidade de casos de coronavirus que están a saltar nos barcos é o motivo polo que reclaman protocolos de prevención e de vacinación fronte ao covid-19. Cabe recordar que ademais do Venturer, o pasado 11 de febreiro o pesqueiro Argos Pereira atracou en Montevideo con varios positivos a bordo.
Neste momento, o veciño de Cangas atópase nun hotel de Salvador de Bahía á espera de que se rehabiliten os voos e poida regresar á súa casa a terminar a súa recuperación.
