Lunes. 24.09.2018 |
El tiempo
Lunes. 24.09.2018
El tiempo

A vila recicla máis e mellor

A concelleira de Medio Ambiente, xunto aos responsables de Recolte, o martes. CEDIDA
A concelleira de Medio Ambiente, xunto aos responsables de Recolte, o martes. CEDIDA

O Goberno local cre que se deu un "salto cualitativo importante" co novo contrato, co que se melloraron as cifras de separación de residuos, substituíronse os vellos colectores e ampliáronse algunhas illas

En agosto de 2017, o servizo de recollida de residuos de Marín estreaba empresa concesionaria. Recolte collía a testemuña de Urbaser, despois de que esta última estivese contratada polo Concello marinense durante 16 anos. Agora, un ano despois, a concelleira de Medio Ambiente, Marián Sanmartín, visitou a nave central que a empresa ten en Barro para facer balance e comprobar que a firma incorporou ao seu material de traballo todos os equipos que lle esixen os pregos de contratación da concesión.

En liñas xerais, o Concello móstrase satisfeito por un contrato que se está a executar con total normalidade, cun seguemento constante desde o primeiro día e co que se están a dar pasos para lograr unha mellora substancial, que xa se notou nestes meses". Precisamente, esa necesidade de optimizar a recollida de lixos na vila foi o que motivou que a Corporación aprobase en xuño de 2016 a non renovación do contrato a Urbaser.

"O novo contrato ten unha duración de oito anos, a diferenza do anterior, que era de 16, o que constituíu unha duración moi longa e unha falta de adaptación á realidade existente que nun período de tempo tan longo xerara moitos problemas", aseguran fontes do Goberno local, que insisten na idea de que a imaxe de Marín cambiou "considerablemente" desde que Recolte está á fronte do servizo.

Unha das cuestións que axudou a ese cambio de aspecto da vila foi a substitución de todos os colectores, un requisito ao que estaba obrigado Recolte por contrato. Pero non só iso, tamén se aumentou o número de illas de reciclaxe, que pasaron de ser 37 a 250, "polo que se chegou a practicamente todos vos recunchos do municipio. Isto fixo que cada domicilio teña unha maior facilidade para reciclar e provoque máis concienciación na veciñanza para incrementar a porcentaxe de reciclaxe", asegura o Goberno local.

Nesta mesma liña realizouse a campaña Reciclar é sinxelo, sabes como facelo?. Este tipo de iniciativas a desenvolver por Recolte tamén constitúen unha obrigación contractual, co obxectivo de fomentar a correcta selección dos residuos entre a veciñanza do municipio, algo que, segundo os datos achegados polo Consistorio, está a conseguirse.

"A calidade na reciclaxe mellorou moitísimo dende a implantación dos novos contedores, pasando de cifras que chegaban ao 60% de impropios a estar actualmente por debaixo do 30%", afirma o Consistorio.

TRABALLADORES. Cando se negociou a redacción da nova concesión, a subrogación dos 16 traballadores que formaban o persoal de Urbaser foi a mecha que prendeu a polémica política que envolveu todo o proceso. Finalmente, despois de que a oposición e o comité de empresa exercesen presión sobre o PP, que nun primeiro momento non apoiaba este aspecto, conseguiuse manter a todos os empregados, 15 deles de forma fixa e outros dous a tempo parcial.

Os agres tempos a nivel laboral parecen, pois, quedar atrás, máis aínda despois de que durante os meses de verán se puidese contratar a máis persoal temporal para cubrir baixas e vacacións e facer labores de reforzo.

Os populares teñen claro que "Marín ten un ano despois unha imaxe máis nova e moderna e un mellor servizo, polo que co novo contrato se conseguiu dar un salto cualitativo importante".

A vila recicla máis e mellor
Comentarios