Repleta. Así se atopaba este venres a Alameda de Marín para escoitar o monólogo de Manolo Lojo ou, o que é o mesmo, Xosé Antonio Touriñán. Non defraudou. E encheu de sorrisos e gargalladas a Alameda de Marín coas súas frases cheas de humor e de moita, moita retranca.
Ante centos de persoas Touriñán debullou unha vida chea de penurias que se incrementaban por momentos, tanto como subían as gargalladas do público. Iso si, dos que podían escoitar, porque a única pega que os asistentes puxeron foi a falta duns altofalantes que permitisen a todos os presentes gozar de todas as ocorrencias dun dos mellores humoristas que ten Galicia no momento actual.
Tras a actuación de Touriñán, a testemuña do humor recollérono as integrantes de DeVacas, que fixeron as delicias do público versionando as cancións máis comerciais con letras galegas cargadas de retranca.
CONTINÚA A FESTA. Este sábado disputarase o VIN Campionato de pesca deportiva Ría de Marín, organizado pola asociación de pescadores Teno. Os pasacalles do grupo folclórico Pousos da Area dará paso á misa solemne cantada en honra á patroa a cargo da Coral Lembranzas. A procesión posterior percorrerá as rúas Jaime Janer, Real e Sol. Nesta última, a Banda da Escola Naval interpretará o himno galego e Sálvea mariñeira.
A partir das 18.30 horas celebrarase o VII Memorial Antonio Fernández, que se iniciará cun desfile por Méndez Núñez, a Avenida de Ourense e a Alameda Rosalía de Castro. Unha vez finalizado, dará comezo o Festival Infantil de Baile, coa participación das asociacións culturais Foula de Cotobade, Trompos ós pés e Os Chaneiros.
O segundo gran concerto das festas será o de Roi Casal, que presentará na vila o seu espectáculo "Son galego, son cubano", co que xa visitou outros lugares da xeografía galega, como Santiago de Compostela ou Bueu. A actuación será na Alameda a partir das 22.00 horas.
O domingo os festexos comezarán ás 10.00 horas co trofeo Virxe do Porto de Ciclismo en Seixo, organizado polo Club Ciclista de Marín. Seguidamente realizarase a travesía a nado no Náutico de Aguete. Durante todo o día, a Asociación O Abeiro rexentará o Mercadillo 3R na Alameda. Ao mediodía, o xadrez será o protagonista, co campionato Ence 2018 no pavillón Illa de Tambo.
Como broche final, realizarase a homenaxe a Antonio Fernández e ao Mestre Landín ás 18.30 horas na Alameda, coas actuacións de Vos de Marín, Musimarín e Os Chaneiros.
