A Xunta de Galicia, a través da Consellería de Cultura, Educación e Universidade, anunciou este mércores a renovación das carpinterías exteriores do IES Chan do Monte e a substitución das cubertas do CEIP Carballal, ambos no Concello de Marín, por un importe de 635.000 euros. O obxectivo da administración autonómica é que ambos os centros gocen das súas respectivas melloras o curso que vén, polo que nas próximas semanas adxudicaranse as actuacións para proceder á súa execución durante os meses de verán.
Ambas as obras foron anunciadas polo delegado territorial da Xunta en Pontevedra, Luís López, nunha visita realizada ao instituto de Mogor coa alcaldesa, María Ramallo, e o xefe territorial de Educación, César Pérez. Tamén lles acompañaron os edís Marián Sanmartín e Manuel Santos e representantes da comunidade educativa do centro.
Con respecto ás actuacións, no caso do IES Chan do Monte, o departamento autonómico investirá 270.000 euros na substitución de todas as fiestras exteriores do edificio, que conta con máis de 3.200 m2. O centro foi construído no ano 1983, polo que presenta, debido ao paso do tempo, certas patoloxías na fachada que se corrixirán con esta actuación.
As novas fiestras serán de carpintería de aluminio con rotura de ponte térmica e vidro dobre. A súa instalación complementarase co cambio de todas as portas exteriores e a substitución dos dinteles dos ocos das fiestras por outros con vigueta autorresistente de formigón pretensado.
O CEIP Carballal recibirá un orzamento de 365.000 euros para modernizar todas as súas cubertas, que contan cunha superficie de máis de 4.000 metros cadrados. Desta forma, completarase a mellora integral do edificio, que xa se beneficiou dunha rehabilitación enerxética, con dotación de illamento, o pasado ano a cargo da Consellería de Educación.
A obra que levará a cabo este verán consistirá na instalación de novas cubertas de panel sándwich con aceiro galvanizado e interior de poliuretano, a dotación de la de roca de 10 centímetros para favorecer o illamento do tellado e evitar as filtracións de auga e a substitución dos canlóns e as bajantes por outros de PVC.
