A Consellería de Medio Ambiente tachou onte de "ridícula" e que busca "enredar e facer barullo" a proposta do alcalde accidental de Bueu, Xulio Villanueva, de que a Xunta acredite como insulares a 12.009 persoas, a totalidade dos veciños e veciñas empadroados na vila morracense
O departamento autonómico recordou que desde o principio a Xunta solicitou ao Concello que lle remitise o censo actualizado de insulars para facilitarlles o acceso a Ons, "algo ao que sempre se negou", asegurou. Ao mesmo tempo, explicou que a conselleira de Medio Ambiente, Ángeles Vázquez, comprometeuse a reducir o número de visitantes e aumentar o de concesionarios e familiares das vivendas da Illa.
Así, a proposta que Villanueva acaba de facer á Xunta, para a Consellería significa dúas cousas: "que non acepta a redución do número de visitantes" para facilitar a entrada de insulares e que "non quere mollarse" á hora de dicir que persoas teñen a condición de insular.
Así mesmo, critica a actitude do alcalde accidental e considera que "non se implica en resolver" este conflito, ao mesmo tempo que indica que "aceptar que todos os veciños de Bueu teñen o acceso libre obrigaría a pechar por completo a Illa, non só aos visitantes senón tamén aos galegos, porque a cota estaría repartida entre os veciños e veciñas de Ons". "O que pedimos é que se traballe con rigor e profesionalidade para que os insulares estean tranquilos e poidan acceder libremente a Ons", conclúe.
RESPOSTA DO PP
A portavoz do grupo municipal do PP de Bueu, Elena Estévez
Así, a 'popular' advirte a Villanueva de que "teña coidado co que remite á Consellería e non xogue co padrón de habitantes de Bueu, non se esqueza que hai unha lei de protección de datos en vigor. Quen é vostede para declarar illán ou con veciñanza na Illa de Ons a todos e cada un dos habitantes de Bueu?", e recórdalle que "de momento é só alcalde accidental esta semana, creo que non hai ningunha lei que lle permita como alcalde dar ou quitar consideración de illán a ninguén".
Ao mesmo tempo, o grupo 'popular' indica que "dá a impresión" de que Villanueva o que pretende é "saciar o seu ego político e a súa ansia desmedida de facer de alcalde, sen importarlle para nada os veciños de Ons. Estamos realmente ante unha decisión consensuada cos demais membros do Goberno ou é imposta polo concelleiro que sustenta a estabilidade do Goberno en Bueu? Comparte Félix Juncal esta ocorrencia?", pregúntase o partido local.
Para rematar, Estévez subliña que con esta decisión de remitir á Xunta un censo de insulars de 12.009 persoas "o que se está a facer é cuestionar ó verdadeiro sentimento insular ou illán. Os veciños de Ons son os únicos que poden falar dese sentimento, por iso mesmo no Plan Reitor de Usos e Xestión son excluídos da cota de visitantes e se lle recoñece unha consideración distinta para acceso á illa".
