O Centro de Arte Municipal recuperou catro dos oito cabezudos que fai 25 anos deixaron de desfilar polas rúas de Sanxenxo durante a celebración das festas patronais.
Coa aparición dos cabezudos recupérase unha tradición que se abandonou e que no seu momento achegaba un toque de humor e colorido á programación dos festexos. O cartel das festas da vila Sanxenxina mantén a mesma esencia dos anos anteriores, pero inclúe como novidade a aparición destas singulares figuras.
A xornada do venres 24 de agosto, co inicio das festas, desfilarán para o gran público acompañados da experiencia Cantos da man de Nelson Quinteiro. O percorrido comezará ás 11.30 horas no Mercado de Sanxenxo e realizará varias paradas ao longo da Avenida de Madrid. Finalmente, terminará na Praza Pascual Veiga. Pola tarde, ás 19.00 os cabezudos atoparanse nas inmediacións do paseo de Silgar.