Luis Vidal Bea, o mariñeiro falecido ao caer ao mar na mañá do día 9, puido sufrir un accidente mentres faenaba, e ser esta a causa que desencadeou a traxedia, porque o suceso produciuse cando estaban a soltar a rede.
Entre os seus veciños barállase a posibilidade de que o mariñeiro se enganchase no aparello e fose arrastrado ao mar, ademais de recibir un golpe. Os que o coñecían subliñan que era un bo nadador, motivo polo que se se caeu, bastaría con que lle arroxasen un salvavidas desde a cuberta do Tucán Dous. En calquera caso, será unha investigación a que determine os extremos desta traxedia e terán un peso determinante os testemuños dos outros dous tripulantes.
Un é o patrón, Santiago Domínguez, que arriscou a súa vida e arroxouse á auga para tratar de salvar ao seu compañeiro. Xon, sobrenome co que é coñecido, recupérase da hipotermia no Hospital Álvaro Cunqueiro. Outra cousa será superar o trauma provocado polo suceso, apuntan na súa contorna. O outro quedou na embarcación para tratar de aproximala ao lugar onde se atopaban ambos.
O accidente produciuse ao norte de Ons, nunha zona onde o mar estaba revolto e sopraba o vento, que descartaron outros barcos para traballar máis preto da costa, pero non había aviso algún de temporal.
O concello do Grove vive este martes a segunda xornada de loito oficial. O enterro de Luis Vidal, de 51 anos e pai de dous fillos, celébrase ás 17.30 horas.
