O alcalde de Vilagarcía de Arousa, Alberto Varela, agradeceu este venres o comportamento dos veciños ante as medidas decretadas polo estado de alarma contra o coronavirus e chamou á "calma" tras ser desinfectado o centro de saúde logo de detectarse "a presenza dun brote de virus Covid-19".
En declaracións a Europa Press, o rexedor destacou que "a maioría" dos veciños do seu municipio, "salvo excepcións moi contadas", respectan as recomendacións das autoridades.
Varela incidiu na colaboración da administración local coa autonómica e central, e subliñou que "as autoridades están a tratar de dar o máximo" para que esta situación termine "canto antes".
En relación ao centro de saúde, recordou que este xoves efectivos da Brilat procederon á súa desinfección e destacou que se adoptaron as medidas oportunas nas instalacións e se seguen os protocolos".
EQUIPO NBQ. Dez militares do equipo NBQ (nuclear-biolóxico-químico) do batallón do cuartel xeral da Brigada Galicia VII desprazáronse ao centro sanitario e desinfectaron as súas instalacións.
O batallón acudiu a petición do alcalde, quen advertiu tanto ás autoridades sanitarias como á Subdelegación do Goberno.