A Consellería de Sanidade aposta por "atraer" pediatras doutras comunidades autónomas e de Portugal co contrato de estabilidade recentemente presentado en Galicia para paliar a falta destes profesionais.
Así o manifestou este martes o titular de Sanidade, Jesús Vázquez Almuiña, ao ser preguntado polas necesidades destes profesionais durante unha visita ás obras do centro de saúde da Illa. "Hai un problema xeral de pediatras a nivel nacional", sostivo.
Así, comentou que "España é un dos poucos países de Europa" que "teñen pediatras en Atención Primaria". "Galicia ten a maior porcentaxe de pediatras en Atención Primaria do país", asegurou o conselleiro, quen situou nun "por 900 nenos", mentres que o cociente en España está "nun por mil e pico".
A ILLA. Sobre o caso concreto da Illa, onde hai 43 nenos, dixo que contan cunha "praza que comparte con outro concello". "O problema é que temos poucos pediatras no territorio español", reiterou, para recordar que Galicia leva a cabo "xestións co Ministerio para incrementar a formación de máis pediatras ao ano e intentar atraer doutras comunidades e de Portugal cun contrato cun salario ao mes importante e estabilidade dun ano mínimo".
"Intentaremos ter máis pediatras en Atención Primaria", asegurou e concluíu que a praza "de aquí (A Illa) non se vai amortizar, vaise manter" para "seguir dando atención pediátrica neste centro".
Almuiña visitou este martes as obras de reforma e ampliación do centro de saúde da Illa de Arousa, que contan cun orzamento total de 484.476 euros e que están próximas á súa finalización, sobre o "15 de marzo", matizou o titular de Sanidade.
HOSPITAL DO SALNÉS. Por outra banda, o conselleiro destacou a importancia de seguir traballando en todo o Sergas "para conseguir un sistema sanitario máis humano" co fin de que o paciente "non deixe de sentirse nunca persoa" e que o sistema "responsa ás súas necesidades".
Así o manifestou no acto de entrega de reacreditación do Hospital do Salnés como 'Hospital IHAN', do que resaltou o seu percorrido realizado desde 2004, cando se logrou o primeiro destes recoñecementos internacionais.
Almuiña agradeceu ao equipo directivo e aos profesionais do centro o seu traballo e animounos a manter "os altos estándares de calidade" que demostran o seu "bo facer" e que "sirvan de exemplo e estímulo ao resto dos centros do Sergas".
O titular de Sanidade recordou "todo o esforzo" realizado desde 2004 cando o hospital arousán foi recoñecido con esta distinción internacional que se outorga aos centros que cumpren cos requisitos sobre protección, promoción e apoio á lactación materna recomendados pola Organización Mundial da Saúde e Unicef.
"Cumprides cos obxectivos que sinala esta iniciativa facilitando ás nais unha elección informada de como alimentar aos seus fillos, apoiando o inicio precoz da lactación materna e promovendo a lactación materna exclusiva os primeiros seis meses", asegurou Almuiña no acto.