OS COMICIOS municipais son para moitos amantes da política os máis emocionantes pola proximidade tanto dos candidatos e candidatas como dos efectos da elección. En Sanxenxo, no que hoxe oito partidos subirán ao cuadrilátero para conseguir a Alcaldía, un bar da rúa Luis Rocafort segue con especial atención estas xornadas previas aos sufraxios.
O propietario do restaurante O Toño, farto de que o único tema de conversa no seu local fose o fútbol pensou, hai 12 anos, en ofrecer unha alternativa durante a campaña electoral. Antonio, máis coñecido como Toño, conta con orgullo que no seu bar só se fai unha porra cada catro anos: na que tanto el como os asiduos intentan adiviñar quen gobernará Sanxenxo e como se repartirán os concelleiros.
"Na campaña de hai catro mandatos ocorréuseme facer isto un día que estaba falando cuns clientes habituais. É só por lecer, non hai cartos no medio", di o creador da iniciativa. "Como o tema político está máis na rúa nestes tempos -que xa case se fala máis dela que do fútbol- a xente involúcrase máis", recoñece.
A aposta é gratuíta. "Xa hai máis de 35 participantes. Tratamos de charlar e mesturar ideas. Para concorrer só é preciso que elixas os 17 concelleiros", engade Toño. "Aquí vén xente de todas as cores e de todos os pensamentos. Esta "porra" é unha maneira de entreterse como se facía nos bares antigos", apunta.
As semanas previas á elección, a clientela de "O Toño" comparte impresións co dono e conforma un resultado dos comicios municipais nun taboleiro chamado "Los sabios del municipio". Nos tres días previos á gran cita, cada un escribe a súa previsión de escanos e introdúceo nunha urna. Esta, será aberta un dos próximos vindeiros venres, «que é cando todo o mundo pode vir xantar».
INFORMADOS. O premio desta particular "porra" aínda é máis especial. Todos os participantes reúnense para celebrar unha cea no local e o agasallo do vencedor é que non paga nada do que consuma xa que é convidado polos demais.
"Aquí cócense moitas cousas. Andamos detrás da noticia. Vir ó bar para informarse das cousas é máis rápido que acudir ás redes sociais", chancea Toño.
Ao dono do bar gústalle falar de política e recoñece que "que sempre prendo eu a muxica para que se comece a falar do panorama actual", confesa.
Desde que comeza a campaña ata que remata os resultados van mudando na cábala do bar. "Prestámoslle atención ás entrevistas que lemos nos xornais e ós debates que se fan tanto na televisión como na radio. O da Cadena Ser desta semana foi moi divertido, por exemplo", pronunciou o hostaleiro que agarda que chegue esta noite para saber se acertou.
Cereixas, vodas e aniversarios
Nunha celebración similar, neste caso no da súa filla que naceu hai 12 anos logo dunhas eleccións municipais, tamén estivo a alcaldable popular de Marín, María Ramallo. Pola súa banda, o socialista marinense Manuel Pazos decidiu sacarlle o son ao móbil e pasar as últimas horas antes da ‘gran batalla’ cos seus seres queridos.
Fútbol feminino
O poiense Ángel Moldes decidiu apoiar ao fútbol sala feminino e acudiu a animar ao Poio Pescamar que se enfrontou, no ‘derbi‘ galego, contra o Ourense. Por contra, a candidata socialista do concello de Poio, Chelo Besada, tivo que pasar a xornada de reflexión exercendo os labores de deputada provincial polo que viaxou ata As Neves.
En Vilaboa, a candidata do BNG, Ornela Fernández, oficiou unha voda civil -como tamén fixo o seu colega de Poio, Luciano Sobral- mentres que o lalinense Rafa Cuíña tamén acudiu a unha pero só en calidade de convidado.