Unha operación conxunta da Garda Civil e a Policía Nacional podería ter desfeito a principal rede de distribución da cocaína galega, supostamente procedente do clan dos Charlíns, por todo o norte español. A actuación saldouse coa detención de oito persoas, entre as cales está o presunto xefe desta organización, que segundo os investigadores sería
Esta organización encargábase de circular e pór no mercado a droga procedente de Galicia nas comunidades de Castela e León, Madrid, País Vasco e Navarra. Pero ao mesmo tempo o mesmo grupo estaría a distribuír por distintos puntos do norte da península marihuana, haxix e diferentes drogas sintéticas.
Para os axentes da orde non hai dúbida de que se trata dunha das organizacións máis activas agora mesmo en España e un auténtico golpe ao clan galego directamente relacionado co tráfico de cocaína procedente de Colombia.
Os arrestados controlaban en Madrid un dos maiores puntos de distribución de cocaína a nivel nacional. No marco da operación, bautizada como Chaplin, foron detidas as citadas oito persoas en Burgos, Navarra, Madrid e Valencia. Ademais, interviñéronse 20 quilogramos de speed, cinco de MDMA, 300 quilos de haxix, 57 de cocaína, 50 de marihuana, dous quilogramos de anfetamina e medio de ketamina.
As investigacións comezaron a principios de 2020, cando os axentes detectaron en Burgos unha serie de reunións entre membros do "clan dos Charlíns" e varias persoas de Burgos vinculadas ao mundo do narcotráfico. Das pescudas realizadas deduciuse que quen se atopaba detrás dos narcotraficantes burgaleses era un vello coñecido da Policía Nacional, cun avultado historial delituoso.
Os investigadores cren que logo de ser detido varias veces, regresou a Burgos para reconstruír a súa organización, para o que pactaría unha alianza cos Charlíns que lle permitía distribuír en exclusiva as súas mercancías na provincia de Burgos. Desde aí, daría o salto a outras comunidades autónomas, onde mantiña contactos con diversas bandas de narcotraficantes.
O delegado do Goberno en Castela e León, Javier Esquerdo, acompañado polo subdelegado do Goberno en Burgos, Pedro de la Fuente, e o comisario Xefe Provincial da Policía Nacional, Jesús Nogales, explicaron onte os detalles desta importante operación conxunta da Policía Nacional e a Garda Civil.
Ademais de cocaína procedente de Galicia, a recentemente reconstruída organización comezaría a traficar con todo tipo de drogas, tanto marihuana e haxix como drogas de deseño, principalmente speed. A ampla variedade de sustancias que chegou a manexar a organización supuña unha capacidade operativa pouco frecuente entre narcotraficantes. Cada tipo de droga impórtase e distribúe dun xeito diferente, o que implica unha gran capacidade loxística e contactos con diversas organizacións para adquirir cada tipo de sustancia estupefaciente.
Durante o ano 2020 foise reconstruíndo a operativa criminal da organización agora desarticulada, que consistía en mover a cocaína e outras drogas recibidas desde diferentes organizacións criminais -ademais dos narcos galegos tamén de organizacións fincadas no Levante e a Costa do Sol-, a un garaxe situado na localidade madrileña de San Sebastián de los Reyes, que servía como punto de abastecemento central.
Desde alí, unha parte importante da mercancía era transportada a unha nave industrial da cidade de Burgos e a dous garaxes situados nas localidades vascas de Ibarra e Ordizia, reconvertidos en laboratorios, onde a droga era almacenada, cortada e preparada para a súa distribución polo miúdo. O resto vendíase a outras organizacións menores que darían saída ao estupefaciente noutras zonas da xeografía española.
A organización contaba para iso cunha gran flota de 20 vehículos, maioritariamente de alta gama, varios deles con compartimentos estancos para ocultar diñeiro ou mercancía, así como de avanzados equipos de transmisións e inhibidores de frecuencia. Estes compartimientos instalados nos vehículos contaban con mecanismos electrónicos de apertura hidráulica que os facía indetectables nos controis rutineiros das Forzas e Corpos de Seguridade.
