Sanxenxo contará cun evento máis na súa axenda deportiva deste ano. O municipio converterase, os próximos 18, 19 e 20 de xuño, no centro de operacións do XIX Rallye do Albariño organizado pola escuadra Corredoira Team da localidade.
A proba, puntuable para o Campionato de Galicia de Rallyes do Asfalto, desprazarase tamén a Meaño, Cerdedo-Cotobade e Ponte Caldelas.
Os concelleiros de Deportes, Seguridade Cidadá e Economía mantiveron este mércores un encontro coa organización para pechar o acordo que se formalizará nun convenio que se asinará proximamente.
A cita deportiva está previsto que arrinque coas verificacións administrativas e técnicas na Praza dos Barcos e, a continuación, realizarase unha cerimonia de saída de tarde desde a Praza do Mar para disputar un tramo cronometrado no parque empresarial de Nantes.
O 19, o evento desprazarase á contorna do campo de fútbol de Portonovo desde onde os coches partirán e regresarán durante toda a xornada na que se realizarán distintas probas.
A organización prevé o desprazamento de contorna a un milleiro de persoas ao municipio. Unha cifra á que habería que sumar os seguidores que arrastra este tipo de eventos e que a organización cifra en 15.000.
Esta proba súmase a outras, como A Volta Ciclista a España (4 de setembro), o Campionato de Europa de Vela de 6 metros (do 9 ao 19 de setembro) e a concentración de Amigos da Moto de Sanxenxo.