A Cámara galega aprobou este venres media ducia de iniciativas, como a impulsada polo Grupo Común da Esquerda na que se insta ao desbloqueo da construción do dique de abrigo no porto de Meloxo, no Concello do Grove.
O deputado Xan Xove (Común da Esquerda) censura que o proxecto está "paralizado", mentres é necesario "incrementar a seguridade" neste porto para "evitar que entren os ventos predominantes do sur que afectan gravemente ao interior deste porto".
Por outra banda, do mesmo xeito que esta, aprobouse a proposta do Grupo Mixto para que as redeiras galegas consigan melloras laborais.O deputado Pancho Casal (Grupo Mixto) reclamou melloras para os espazos nos que traballan as redeiras, nunha iniciativa na que se insta ao Goberno central a reducir o coeficiente para a xubilación na Seguridade Social.
O Parlamento tamén aprobou outra proposta socialista na que se require ao Goberno galego que entregue á Cámara o plan de acción de marisqueo co horizonte de 2030, pois a deputada Patricia Otero alerta de "escurantismo".