O goberno municipal de Cambados recorrerá á vía contenciosa se a entidade Portos de Galicia non concede unha nova concesión para o uso do Salón Pena, onde o Concello viña celebrando actividades culturais e de lecer.
Tras a cesión por 15 anos, Portos de Galicia decidiu pór fin á concesión permitindo o seu uso municipal a condición de que o concello solicite permisos especiais para cada actividade.
Para o goberno local, esta medida é unha "incongruencia" xa que as actividades que se realizan entran dentro dos usos de lecer que permite Portos de Galicia.
En todo caso, segundo a alcaldesa, Fátima Abal, "o Concello de Cambados non vai quedar de brazos cruzados" polo que procederá a pedir unha nova concesión do Salón Pena. De non ser aceptada, presentarán un recurso de reposición e incluso chegarían á vía xudicial cun contencioso administrativo.
O edil de economía, Xurxo Charlín, tampouco descarta a posibilidade de reclamar ante Portos de Galicia o diñeiro de fondos municipais investidos na remodelación do Salón Pena.
Ademais, solicitan a Portos de Galicia que resolvan canto antes o Plan Especial e a desafectación dos terreos que solicitou o concello hai seis anos, unha situación que tamén afecta a máis municipios e que só é "un aproveitamento económico" por parte de Portos de Galicia.