A esperada reapertura do Centro de Día de Sanxenxo, que permanecía pechado desde marzo de 2020, xa é oficial. Será ao longo desta semana e de forma gradual. Así o confirmou este domingo o alcalde, Telmo Martín, acompañado do director xeral de Atención Integral Sociosanitaria, Antonio Acevedo, xunto ao concelleiro de Servizos Sociais, Daniel Arousa.
O Centro de Día, explicaron, recibirá 30 usuarios "baixo un estrito protocolo anticovid". O mércores, día 9, incorporaranse os primeiros nove usuarios e o xoves, día 10, os outros 21. Nas últimas semanas realizouse unha posta a punto das instalacións, con pequenas obras de reparación, limpeza e desinfección dos espazos e acondicionamento dos xardíns exteriores. A actividade retomarase cunha nova furgoneta adaptada de sete prazas que, unida a outra de similares características, mellorará a calidade do transporte dos usuarios.
"Sei que esta apertura é moi importante para moitas familias do municipio e para moitos usuarios que veñen a este centro. Facémolo agora coas maiores garantías posibles e cun servizo acorde á situación actual", asegurou o alcalde.
O director xeral de Atención Integral supervisou o bo estado das instalacións, de titularidade municipal, que ofrece servizos de xeriatría, enfermería e fisioterapia, entre outras actividades.
Ademais, mentres non se completou o proceso de vacinación, realizarase un plan de cribado: Un test de antíxenos a todos os usuarios e traballadores cada 15 días e unha proba PCR cada mes a un terzo dos mesmos. Cando se completou e transcorran polo menos 14 días desde a segunda dose de vacina, só se realizarán test de detección da covid-19 a aqueles que presenten síntomas.
O horario do Centro de Día manterase de 9.00 a 19.30 horas e dispón de 80 prazas totais para usuarios.