O campo de fútbol de O Revel xa non é un lugar apto para levar a cabo un adestramento "seguro". Niso coinciden os dous principais clubes sanxenxinos que fan uso do terreo, o Sporting Club Libertad e o Villalonga FC. Este último, que adestra en O Revel ás categorías Senior e Base, viuse na obriga de buscar alternativas ante o deterioro das instalacións para non ter que frear a actividade. "Tivemos que pedir campos prestados. Os xoves o equipo adestra en As Cachizas, en Dena, e os martes no campo de Zacande, no Mosteiro, e estou moi agradecido por este favor que nos están facendo", conta o presidente do Villalonga, Marcelo Muñiz.
A medida, que tamén inclúe a alternancia dos adestramentos no campo de herba do equipo, situado na Praza Pública de Vilalonga, tomouse a raíz das recorrentes lesións que teñen lugar durante partidos e adestramentos. "Teño a dous xogadores de Preferente lesionados de gravidade para todo o ano polo estado do campo. Os tacos das botas quedan agarrados ao céspede e non se xira ben", conta o presidente, quen tamén destacou o accidente dun rapaz no campo hai cinco meses. "Raspou toda a cara, e aínda hoxe ten as marcas, que lle van quedar de por vida", conta.
"É coma xogar enriba do asfalto", sinala un dos membros da directiva do Sporting Club Libertad, Luis Prieto. "Cando chove enchárcase e, cando non, seca tanto que é coma unha lixa. Algunhas das raias que dividen o campo están soltas, podes levantalas enteiras", engade. Ademais de urxir á reparación do terreo de xogo, Prieto destaca a ausencia de coidados nos últimos tempos. "O Concello non ten unha persoa no campo que se dedique a iso, un bedel que abra, cerre, ou se encargue do rego. Coa crise reduciuse o persoal, nós tratamos de coidalo pero non é o mesmo. Ao céspede nunca se lle pasou un cepillo e agora está duro coma un croio. Foi un campo que tivo moito trote no seu día ata que se fixo o de Baltar, e agora dáselle prioridade a outras cousas. Isto tiña que estar no verán, logo houbo un parón de Nadal e aínda seguimos así", explica.
LICITACIÓN. O Concello de Sanxenxo anunciou a actuación no campo de O Revel o pasado mes de novembro, unha obra que se inclúe no Presuposto municipal para 2020, e que consiste na renovación da capa de céspede artificial deteriorada que presenta o campo, e a substitución por un novo céspede de última xeración.
Inicialmente, o Goberno local anunciou un prazo de execución de dous meses, cunha partida de máis de 245.000 euros.
A renovación do céspede do campo de O Revel inclúe, segundo sinala o Goberno local, un sistema de rego. O Concello tamén avanzou que en breve sairá a licitación do proxecto, cuxo prezo será lixeiramente inferior do inicial.
A nova superficie que se prevé instalar está composta por unha base elástica prefabricada de 10 milí- metros de espesor, céspede de última xeración e un pegado con dobre capa de polipropeno. Na actuación tamén se levará a cabo a marcaxe dos campos de fútbol 11 e fútbol 7.
As obras para levar a cabo o proxecto acometeranse mediante a desmontaxe total da actual capa de céspede cunha maquinaria específica, e a posterior substitución, para a que aínda non hai data de finalización fixada.
