A dixitalización chegou ao comercio local de Sanxenxo. Baixo a marca Entretendas e da man da aplicación Zaska, un total de 33 empresas de diferentes sectores do comercio sanxenxino acaban de dar o paso de dixitalizar a súa oferta, nunha iniciativa que foi presentada na mañá de onte polo concelleiro de Promoción Económica, Marcos Guisasola, o presidente de Entretendas, Xullo Presas, e o deseñador da plataforma online, Yago Novoa, e que supón a localización da oferta en tempo real, nun radio de 3 km.
A plataforma achega unha solución de dixitalización interna aos establecementos e unha nova opción de compra aos clientes do comercio local sanxenxino que, no caso do municipio, grazas ao labor conxunto de Concello e Entretendas, é gratuíta, e durante o primeiro ano tampouco suporá ningún custo para ningunha das entidades.
O presidente do Centro Comercial Urbano Entretendas, Xullo Presas, explicou que o sector se atopa nun momento delicado por mor da covid-19, polo que agradeceu a axuda do Concello neste tipo de iniciativas e nas habituais campañas que desenvolve o colectivo de comerciantes sanxenxinos. Neste sentido, asegurou, a plataforma é unha "axuda, non só a nós, senón a moitas outras poboacións" a nivel estatal, xa que, asegurou, "para este tipo de empresas é moi complicado crear as súas plataformas desde cero".
Presas animou aos establecementos locais de Sanxenxo a unirse á iniciativa, e tamén aos potenciais clientes do municipio, que deben descargar a aplicación Zaska para acceder á oferta local "online", que está dispoñible tanto para sistemas operativos "Android" como "iOs". "Animamos a que a utilicen, porque aí verán a ampla gama de produtos que temos no noso centro comercial urbano", asegurou.
Pola súa banda, o deseñador da aplicación, Yago Novoa, cifrou a incidencia da nova aplicación nun total de 500 establecementos adscritos no territorio estatal e 3.000 usuarios. "Para ser o inicio da aplicación valoramos a cifra positivamente, e buscamos mellorar, innovar e que a xente, de inicio, poida entender o software, e que entenda isto como unha canle máis de dixitalización e de venda".
