A expropiación da leira das Cunchas, propiedade da familia Rocafort, converteuse nun dos principais temas de debate no Pleno ordinario do pasado luns, durante o cal o Goberno municipal insistiu en que esgotará todos os recursos para tratar de evitar que, no peor dos casos, o pago supere os tres millóns de euros fixados no seu día polo Tribunal Supremo.
Neste sentido, o alcalde, Telmo Martín, desvelou que se presentou un recurso ante o Tribunal Constitucional, que aínda non se pronunciou respecto diso. Ademais, o alcalde mostrouse convencido de que finalmente non haberá que abonar unha contía a maiores pola expropiación dos viarios da zona. O bipartito defende que son públicos. "De non ser así, ese non podería ser un chan urbano consolidado, polo que debería ter outra valoración", argumentou o rexedor do Partido Popular.
O debate xurdiu por mor dunha proposta de Alcaldía de descartar unha reclamación contra a aprobación da modificación de crédito ideada no seu día para facer efectivo o pago dos tres millóns de euros. Martín tamén indicou que o ano pasado mantivo unha reunión cos propietarios da parcela para ofrecerlles o pago inmediato desta cantidade, a cambio de que renunciasen a continuar coa vía xudicial. Pola súa banda, a oposición coincidiu á hora de advertir de que, no caso de que sigan dilatándose os prazos, existe o risco de que os custos se eleven en concepto de intereses e costas.
