"Altivo", "chulesco", "soberbio" e "indigno" son os cualificativos empregados polo PSOE no Concello de Sanxenxo para definir o comportamento do alcalde, Telmo Martín. "A falta de argumentos de peso sobre o preito cos Rocafort, bos son os insultos", expón o Concello. "O Goberno non necesita cualificativos grosos para pór en evidencia as súas afirmacións", agrega.
Neste preito PSOE, BNG e Ciudadanos deberían explicar porqué a súa posición "sempre coincide cos intereses dos Rocafort", manteñen os representantes da Administración local. Que non compartan a estratexia do Goberno local resulta comprensible, pero solicitan que deixen de actuar "como avogados da parte que demanda ao Concello".
O Executivo recorda que os Rocafort iniciaron o preito pedindo 47 millóns de euros, e que a oposición asumiu como propia esa demanda. "Só cando o Supremo desestimou tan disparada petición, a oposición moveuse aos 14, que é menos da terceira parte. Logo aos sete, que é a metade, e agora di que a metade da metade, case catro", detalla.
O contencioso segue pendente dunha sentenza do TSXG e da reclamación, pola vía civil, da titularidade pública do viario das Cunchas
O Concello mantén que nun preito sobre unha expropiación, a Administración local sempre acaba pagando, pero a cuestión é canto, "e de 47 a catro millóns de euros" vai un mundo, subliña.
O Goberno local puntualiza que o PSOE, BNG e Ciudadanos acordaron coa familia pagarlle 3,1 millóns de euros en tres anos, 2017-18 e 19, e o PP freou a operación porque entende que "era inaceptable" se antes a familia non retiraba o recurso do Supremo. "¿Por que ían pagar a pesar de que os Rocafort mantiñan viva a súa reclamación sobre a propiedade do viario das Cunchas?", pregunta.
O contencioso segue pendente dunha sentenza do TSXG e da reclamación, pola vía civil, da titularidade pública do viario das Cunchas, subliña a Administración local. "Nós temos outra estratexia, e é o que molesta aos catastrofistas", asegura, ademais de recordar que a vía xudicial aínda non está finalizada.
O Goberno local de Sanxenxo empraza ao PSOE, BNG e Ciudadanos a manifestar publicamente se coinciden coa familia Rocafort, cando reclama a propiedade do viario das Cunchas ou se, pola contra, consideran que é público e non hai que pagar por el, como mantén o Executivo presidido por Telmo Martín.
"Mentres non se mollen nesta cuestión e defendan a titularidade pública do viario, asunto clave no preito, carecerán de credibilidade e, o que é máis grave, estarán a traizoar a súa primeira obrigación como concelleiras, defender sempre o interese xeral de Sanxenxo", conclúe o Goberno local.
