O Concello de Sanxenxo permitirá –previa solicitude de autorización– a realización de fogueiras en cinco praias durante a noite de San Xoán. Os areais nos que se poderán celebrar a festa son Agra, Nanín, Panadeira, Silgar e Caneliñas. En consecuencia, non se poderán acender fogueiras en ningún dos 13 areais restantes.
É o segundo ano que o Concello toma esta decisión tras a boa experiencia do pasado.
A Policía Local encargarase de vixiar e valar os accesos a praias como Montalvo nas que hai anos se producían concentracións masivas e fogueiras non autorizadas que danaban os areais e a súa contorna.
Ademais, o Concello porá en marcha un operativo especial da Policía Local, os servizos de urxencia e o servizo de limpeza. Neste sentido ás seis da mañá evacuaranse as praias para proceder á súa limpeza garantido que estarán en perfectas condicións ás dez.
Outras medidas preventivas son a colocación de valos para delimitar os espazos autorizados e bidóns para a recollida de cinza. Entre os requisitos esixidos para poder realizar as fogueiras en devanditos areais atópase a queima unicamente de leña limpa e en ningún caso de materiais plásticos, madeiras pintadas ou con cravos. Tampouco se poderán levar á praia botellas ou vasos de vidro, nin reproducir música cun volume que poida molestar a zonas de vivendas.
O prazo para a solicitude de autorización e identificación das persoas que se farán responsables de cada unha das fogueiras autorizadas abrirase este mércores día 5 e prolongarase ata o 20 de xuño ás 15 horas. Os interesados deben contactar coa concellaría de Medio Ambiente no teléfono 986 74 49 09, ou presencialmente en Vilalonga.
O Servizo de Urxencias de Sanxenxo desenvolveu un sistema innovador que mellora as comunicacións relacionadas coas fogueiras de San Xoán e San Pedro. Consiste en escanear un Código QR, que aparece na folla da solicitude para facer unha fogueira. Mediante este código ademais de comprobar a validez da autorización, o código permite ao solicitante comunicarse directamente co servizo de urxencias e a policía local entre as 23.00 do 23 de xuño e as 9.00 do día 24 , por se ocorrese algo que requirise a intervención dos bombeiros.
