A remodelación do porto de Portonovo cobra forma segundo pasan as semanas. O alcalde de Sanxenxo, Telmo Martín, mantivo durante a mañá do luns en Santiago de Compostela un encontro coa presidenta de Portos de Galicia, Susana Lenguas, no que abordaron, entre outros asuntos, o convenio para convocar un concurso de ideas sobre a remodelación do porto de Portonovo, no que conviven actividade pesqueira e pasaxe. Ambas as entidades implicaranse na consecución do mellor anteproxecto para a transformación da fachada marítima, que implica tamén parte do chan da vila mariñeira.
O convenio do concurso de ideas, no que colaboran os colexios oficiais de Arquitectos e de Enxeñeiros de Camiños, Canles e Portos de Galicia, previsiblemente entrará en vigor o próximo mes de outubro cunha dotación orzamentaria aínda por determinar, pero que permitirá facer unha análise de usos e necesidades que convivan na zona, unha das esixencias do concurso. Valoraranse aquelas actuacións concibidas con criterios estratéxicos, funcionais, ambientais e sostibles, adaptándose ás necesidades sociais e de mobilidade da contorna.
O ambicioso proxecto, que reformulará a zona portuaria de Portonovo e marcará as directrices de desenvolvemento portuario, deberá contemplar a mellora do espazo puramente portuario, así como a creación de espazos públicos, zonas verdes e prazas de aparcadoiro.
OUTRAS MELLORAS. Durante a reunión celebrada o luns coa presidenta de Portos de Galicia, Telmo Martín expuxo, ademais, unha iniciativa para a zona portuaria da contorna de Sanxenxo, como é a posibilidade de asinar un convenio con Portos de Galicia para a mellora integral do paseo de madeira dos Barcos na vila de Sanxenxo, expondo tamén a posibilidade de que toda a zona sexa de competencia municipal, debido ao seu actual peso turístico. Susana Lenguas comprometeuse a estudar a proposta.
