A Garda Civil interceptou un home de 44 anos en Vilanova conducindo en estado de embriaguez, sen a ITV do seu vehículo en regra e saltándose os límites de velocidade. Un cóctel de infraccións co que a Benemérita pillouno, ademais, en dúas ocasións en menos de media hora. Os feitos, segundo informou o instituto armado, sucederon o pasado domingo na estrada PO-531, ao seu paso polo municipio arousán.
Nun control que estaban a realizar na localidade de Baión, os axentes rexistraron que o condutor pasou a 74 quilómetros por hora nunha zona limitada a 50, pero non lograron identificalo nese momento. Pouco despois, no mesmo punto pero en sentido contrario, volveu superar os límites de velocidade, neste caso circulando a 87 quilómetros por hora, e esta vez os axentes lograron interceptalo e inmobilizar o seu coche.
O home, que realizaba un desprazamento autorizado, presentaba síntomas de consumir bebidas alcohólicas, polo que foi sometido ás probas de alcoholemia que arroxaron resultados positivos de 0,43 e 0,39 miligramos por litro de aire expirado.
Ademais de ser denunciado por conducir en estado de embriaguez, os axentes comprobaron que o coche non tiña pasada a ITV, polo que lle imputaron unha segunda infracción. Ao ser un desprazamento autorizado non foi denunciado por infrinxir as restricións impostas polo estado de alarma.
