Desde hai anos, colectivos como a Asociación Peludos Invisibles (APIS) levan insistindo na necesidade de que Sanxenxo conte con espazos habilitados para que as mascotas poidan correr e xogar libremente, sen verse sometidos a correas nin arneses. A dotación dunha praia ou un parque canino é unha demanda solicitada en máis dunha ocasión. Agora, a esta petición tamén se sumaron varios veciños do municipio, que teñen previsto organizar unha manifestación o próximo 25 de agosto para reclamar que se habilite un espazo para cans en Punta Vicaño, entre a praia de Silgar e Baltar.
A marcha, que xa conta co visto e prace da Subdelegación do Goberno en Pontevedra, dará comezo ás 20.00 horas nas inmediacións do parque do Espiñeiro, en Portonovo, e concluirá ás portas da Casa Consistorial sanxenxina, na Praza Pascual Veiga. Alí procederase á lectura dun manifesto, no que se deixará patente a necesidade de que unha vila turística como Sanxenxo ofreza este tipo de servizos para canes. Así o entenden os responsables de Peludos Invisibles, que advirten de que "a falta de ofertas e propostas por parte da Administración choca co esforzo que están a realizar os profesionais do sector hostaleiro á hora de dar cobertura a familias que viaxan coas súas mascotas". Neste sentido, cada vez son máis os turistas que solicitan poder estar acompañados dos seus cans durante os seus días de descanso.
A iniciativa, que tamén inclúe unha recollida de firmas, faise máis necesaria, se cabe, porque "a nova lei proposta pola Xunta de Galicia é moito máis restritiva que a súa predecesora", advirte APIS. A normativa vixente, que substitúe á aprobada no ano 1993, "prohibe especificamente a entrada de cans soltos en espazos públicos, por iso é polo que sexa necesaria unha alternativa en forma de parque ou praia canina", recalca a asociación a través das súas redes sociais.
EN ADINA. Cabe recordar que o Concello ten previsto habilitar un parque canino nas inmediacións da Casa de Cultura de Adina. A localización, no entanto, non convence aos grupos da oposición, que entenden que sería máis adecuado que as instalacións se situasen en Baltar (ese foi o emprazamento elixido polo anterior tripartito). Para poder acollelo no emprazamento actual, foi necesario redefinir a parcela, algo que se aprobou nunha sesión plenaria celebrada este mesmo ano. Foi nese debate cando a socialista Coral González-Haba, responsable do proxecto inicial durante a súa etapa á fronte da Concellería de Medio Ambiente, lamentou o traslado do parque.
Polo que respecta á praia canina, trátase dun proxecto que, de momento, permanece aparcado. E é que este tipo de areais teñen que cumprir uns requisitos moi específicos, como non pertencer á Rede Natura. Con todo, isto non impide que vilas como O Grove xa dispoñan de praias para mascotas.
Non é a primeira vez que Sanxenxo acolle unha marcha para reivindicar este servizo. En abril de 2012 tamén levou a cabo.
