Unha ánfora da época romana achada recentemente nas inmediacións da illa de Cortegada (Vilagarcía) é un vestixio que data de entre os séculos I da época anterior e a recta final do primeiro da actual. é de tipo Dressel 2-4.
A peza, da que se conserva a parte superior, a base e a boca, pero non as asas, foi gardada por un veciño de Carril, que decidiu entregala ao Parque Nacional das Illas Atlánticas
Esta acción fixo posible a identificación da peza cerámica, que non é a primeira achada na contorna de Cortegada e vén ratificar que a illa se atopa nunha ruta de navegación comercial usada polos romanos.
O traballo dos investigadores permitiu determinar que foi fabricada nun taller oleiro situado no norte de África, entre Tunisia e Libia, e que probablemente foi usada para transportar viño, como demostra o seu interior recuberto de resina.
Trátase da primeira deste tipo fabricada en África e documentada en territorio galego, onde as pezas deste tipo máis habituais son as procedentes do golfo de Nápoles, e que servían para exportar o viño de Campania.
"Cómpre subliñar que a identificación nestes casos adoita ser difícil, non tanto á hora de determinar a tipoloxía, senón máis ben ou seu lugar de produción, dado que a pasta cerámica dá que están feitas adoita estar moi modificada tras pasar séculos mergulladas non océano", sinalan os arqueólogos da Universidade de Vigo.
Neste caso foi posible establecer con seguridade o tipo e o lugar de procedencia, dous datos moi importantes para reconstruír a ruta e o produto que chegou ás costas galegas en época romana.
Este achado reforza a importancia de Cortegada na época romana, que impulsou varias actuacións arqueolóxicas, especialmente na contorna de Punta Fradiño.
O obxectivo, non alcanzado aínda, foi localizar un pecio romano de cuxo cargamento se recuperaron ánforas e outras cerámicas por parte de pescadores, mergulladores e en intervencións arqueolóxicas, como a levada a cabo nos anos 80 do século XX polo Museo de Pontevedra e a Comandancia Militar de Mariña de Vilargacía e cuxos achados están depositados no Museo Provincial.
