A orde de confinamento ditada polo Goberno para evitar a propagación do coronavirus está a provocar que as rúas e praias das localidades situadas no litoral pontevedrés estean practicamente desertas e que o seu aspecto en nada se pareza ao rexistrado en anos anteriores durante as vacacións de Semana Santa. Esta imaxe é a que puido contemplarse durante o fin de semana en municipios como Poio, O Grove e Sanxenxo, do mesmo xeito que en Cambados, Vilanova de Arousa ou Vilagarcía.
Claro que se volveu cumprir a máxima de que a excepción confirma a norma, e esta produciuse en Poio o día 4. Un matrimonio de Ourense foi sorprendido cando se dispuña a marchar de vacacións, e ambos os cónxuxes ocupaban os asentos dianteiros, cando debería ir un no dianteiro e o outro no traseiro, e en diagonal, polo que lles foi aberto un expediente sancionador.
No Grove os controis foron instalados na rotonda situada no punto onde finaliza o itsmo da Lanzada, á altura da rotonda de San Vicente do Mar, e un axente da Policía Local indicou que non se produciu incidencia ningunha.
