O Consello Regulador da Denominación de Orixe Rías Baixas indicou este martes que unha de cada tres botellas que se produce acaba véndese no mercado. Así, das máis de 170 adegas que integran esta denominación unhas 107 apostan pola exportación.
Neste sentido, expresaron a súa satisfacción pola "actitude de relativa esperanza" que mostran os crecementos do 5,78% en volume e o 4,34% en valor durante a campaña 2019/2020, que estivo marcada pola situación económica incerta debido á pandemia do covid-19, os aranceis en Estados Unidos e a ameaza do Brexit.
O conselleiro do Medio Rural, José González, acompañado do presidente da Denominación de Orixe Rías Baixas, Juan Gil de Araujo, participou este martes na presentación dos datos de exportación da última campaña deste selo de calidade, comprendida desde o día 31 de agosto de 2019 ata o 1 de setembro de 2020.
O feito de que as exportacións de viño da Denominación de Orixe Rías Baixas sigan crecendo nun escenario tan adverso "é unha magnífica noticia, e un logro de todos", subliñou Gil de Araujo.
Segundo os datos facilitados polo Consello Regulador, as exportacións en mercados internacionais ascenderon a 8,2 millóns de litros e 45,6 millóns de euros.
O prezo medio do litro vendido, sitúase por encima da media nacional, alcanzando os 5,54 euros, cunha caída de 0,07 euros respecto da pasada campaña.
O terceira D.O. española
O conselleiro do Medio Rural destacou que "Rías Baixas é a terceira Denominación de Orixe española en volume de exportacións aos Estados Unidos".
Das 11.006.190 botellas de viño de Rías Baixas que se venderon nos mercados internacionais, Estados Unidos mantense á cabeza, absorbendo o 27,29% do total das exportacións destes viños.
Tamén chamaron a atención sobre o "bo comportamento" de Reino Unido, xa que "a pesar da ameaza do Brexit" as vendas incrementáronse un 16,14% en volume e dun 15,50% en valor con respecto á anterior campaña.
Igualmente destacaron polo seu bo comportamento o mercado de Porto Rico, un destino que non deixa de crecer en valor e volume (19,54% e 7,53%, respectivamente), e completan o ranking dos cinco primeiros mercados Alemaña e Irlanda.
Dez primeiros países
Entre os dez primeiros países no que a volume se refire figuran Canadá, Holanda, Suecia, México e Rusia. Destacan os incrementos en volume e valor, superiores ao 40%, de Rusia e Suecia, así como a tendencia positiva de Canadá e Holanda.
Por primeira vez en campaña, as vendas en volume de litros de viño no mercado interior (Unión Europea) superan ás do continente americano.
Así, exportáronse á Unión Europea 3.882.879 litros (rexistrando un crecemento do 12,82%), mentres que a América vendéronse 3.512.673 litros.
