A Garda Civil investiga un home residente no municipio do Grove por levar na súa furgoneta o adhesivo da ITV do coche do seu fillo, informaron fontes do citado corpo policial. Nun control preventivo na rotonda de San Vicente, a Benemérita ordenou parar a furgoneta en cuestión, que conducía neses momentos o fillo do seu propietario.
Os axentes pescudaron que a furgoneta tiña a tarxeta de inspección ITV caducada desde xullo de 2018 e que tiña o adhesivo doutro vehículo, o do seu fillo, que neses momentos a conducía.
O propietario da furgoneta corre o risco de ser condenado por falsidade documental, sen prexuízo da denuncia administrativa contra o seu fillo por conducir coa ITV caducada. Ambos, pai e fillo, teñen un amplo historial delituoso, un deles por falsificación de placa de matrícula, segundo as citadas fontes.
