A Garda Civil detivo a dous veciños da comarca pontevedresa do Salnés tras ser sorprendidos cando efectuaban unha transacción de cocaína a pequena escala en Vilanova de Arousa. Así o informou o Instituto Armado, que puntualizou que aos dous acúsaselles dun suposto delito contra a saúde pública por tráfico de drogas.
Os feitos ocorreron o pasado venres cando unha patrulla da Compañía da Garda Civil de Vilagarcía observou "a actitude sospeitosa", relataron as mesmas fontes, dos dous ocupantes dunha furgoneta que estaba estacionada na parroquia de Deiro, en Vilanova de Arousa, "ao ausentarse precipitadamente do lugar cando se decatan da presenza" dos axentes.
"A inmediata reacción dos axentes permitiu dar alcance á furgoneta, pese que ás reiteradas desobediencias ás indicacións luminosas e acústicas para que detivese a marcha, procedendo á inmediata detención dos dous ocupantes", subliñou a Benemérita.
CASE 50 DOSE. Nos rexistros efectuados, tanto ao vehículo como aos ocupantes, interviñéronselle case 50 doses de cocaína e 184 euros en efectivo ao condutor. Ademais, os axentes puideron determinar que o acompañante acudira á cita nunha motocicleta que estaba estacionada nas inmediacións do lugar onde supostamente xestionaban a transacción da droga.
Os dous detidos, xunto coas dilixencias e os efectos intervidos, foron postos a disposición do xulgado de Instrución de garda de Vilagarcía de Arousa. Ambos foron denunciados, igualmente, por non respectar o confinamento que determina o vixente estado de alarma pola crise sanitaria.
