Os axentes da Policía Local de Vilagarcía foron chamados ás 7.00 horas do día 22 desde unha vivenda situada na zona da Coca. O motivo era que nun domicilio estaba a producirse unha violenta discusión.
Segundo figura no atestado levantado polos axentes nun caso de presunta violencia machista, "a disputa comezou cando ao chegar á casa despois de saír cunha amiga, a muller, de 23 anos, foi increpada pola súa parella, tamén de 23 anos, que a estaba a esperar".
O parte redactado polos policías tamén indica que a muller asegurou "que o home lle levantou a man, golpeouna nunha perna e froito da pelexa, tiroulle ou móbil ao chan rompéndollo".
O suposto agresor, cuxa identidade responde as iniciais J.S.A., foi detido e trasladado aos calabozos da Comisaría, á espera de pasar a disposición xudicial para declarar.
