A Deputación de Pontevedra asinou este venres un convenio de colaboración cos concellos de Caldas de Reis, Portas e Vilagarcía de Arousa, para acometer a primeira fase do proxecto de acondicionamento da Vía Verde do Salnés, cuxo obxectivo é proporcionar un uso alternativo á infraestrutura do ferrocarril fóra de servizo en parte da liña Redondela-Santiago de Compostela.
Será unha senda peonil e ciclista que aproveitará o trazado ferroviario en desuso. Terá unha lonxitude de case 10 quilómetros, partindo de Abelle (Rubiáns), pasando por Caldas e finalizando na estación de Portas.
A presidenta da Deputación de Pontevedra, Carmela Silva, sinalou que con este convenio preténdese dar resposta "á crecente demanda" da cidadanía para dispor de servizos turísticos alternativos que lles permitan practicar diferentes experiencias deportivas, culturais e de contacto coa natureza.
A presidenta destacou que "sumar sinerxías é moi importante para sacar adiante iniciativas" e recordou que, con este convenio, o goberno provincial "cumpre o compromiso" adquirido con este proxecto, que xustificou como "un argumento máis" para visitar a zona.
Esta primeira fase para a posta en marcha da Vía Verde ten un investimento de 356.186,87 euros, pero o proxecto global é de algo máis de 565.000 euros, cuxa parte restante correspondería á Xunta de Galicia, que xa remitiu unha proposta de borrador de convenio para asinar a tres bandas.
CALIDADE TÚRISTICA. A alcaldesa en funcións de Vilagarcía, Tania García, deu a benvida á incorporación da Xunta e mostrou a súa satisfacción porque "logo de tanto tempo" este proxecto "vai ser realidade". Neste mesmo sentido pronunciáronse o alcalde de Portas, Víctor Estévez, e o de Caldas de Reis, Juan Manuel Rey, que asegurou que con esta Vía Verde "vai crecer a calidade turística da provincia".
A Vía Verde do Salnés converterase na primeira Vía Verde íntegra en Galicia, xa que na actualidade só existe a Vía Verde do Eo, que é compartida entre Galicia e Asturias.
