O propietario do circuíto Racing Dakart Sanxenxo, a empresa París Dakart Karting, ve "inexplicable" e "inxusta" a sentencia emitida hai uns días polo Tribunal Superior de Xustiza de Galicia (TSXG) por mor dun accidente rexistrado en 2009 nunha proba oficial de scooters.
No fallo, a Sala de Social establece que a firma, a Asociación Moto Club París Dakart, a Federación Galega de Motociclismo e AIG Europe Limited deben pagar unha indemnización de 706.419 euros a un traballador da firma que participaba na organización do 28º Campionato Galego de Scooters e que como sufriu graves secuelas nun sinistro ocorrido nos adestramentos previos que o obrigaron a depender dunha cadeira de rodas. A esa cifra hai que sumar 130.000 euros para gastos dos coidados por parte da nai.
Coñecida a resolución, que eleva a cantidade que establecera en primeira instancia un xulgado de Pontevedra —365.108 euros—, París Dakart Karting asegura nun comunicado que é "moi inxusto que un accidente alleo á empresa lle custe case medio millón de euros". Considera que, ao tratarse dun sinistro ocorrido nunha competición, debería ser o
A empresa, que subliña que o afectado facía ese día "labores de bandeira como voluntario na proba", computa no seu cálculo do importe a afrontar o que debe abonar en concepto de indemnización e 166.000 euros pagados á Seguridade Social e en nóminas do traballador ata que obtivo a baixa permanente, ademais de gastos "implícitos á súa defensa".
A firma entende que debería corresponder ao seguro da proba facer fronte aos danos rexistrados na competición
París Dakart Kartingasegura que o circuíto de Sanxenxo "podería verse abocado ao peche" ao ter que afrontar "un pago tan elevado". Defende que nos seus 30 anos desenvolvéronse máis de 70 campionatos oficiais, e que "as medidas de seguridade eran extremas e sempre se facían ao amparo da federación e con todos os seguros en regra".
A empresa asegura que o feito de que teña que asumir unha parte da indemnización "só se entende por un erro administrativo". Segundo explica, o día despois do accidente a súa asesoría deu de baixa o afectado por accidente laboral "en lugar de por outras causas". "A pesar de corrixir o erro dous días despois, este non foi validado a pesar de que o accidentado tiña un contrato como mecánico de París Dakart Karting e que no momento do accidente non se atopaba prestando eses servizos", di.
O sinistro produciuse en setembro de 2009, cando un dos pilotos que participaba nos adestramentos libres perdeu o control á saída dunha curva, caeu ao chan coa moto e arrastrouse ata alcanzar as proteccións plásticas da zona de acceso, detrás das cales se atopaban o comisario técnico da carreira e o demandante, cuxa función era a de mover esas barreiras para dar acceso ás motos á pista ou, desde ela, aos boxes.
Debido ao golpe da moto, as proteccións caeron sobre o demandante, que tiña 38 anos, e o comisario técnico e ocasionáronlles lesións. O afectado, que foi declarado en situación de grande invalidez, sofre graves secuelas.