O 35% dos alumnos e alumnas do curso de soldadura levado a cabo dentro do Programa Integrado de Emprego desenvolvido pola Mancomunidade de Salnés serán acollidos por empresas do sector do metal para realizar prácticas. Nisto consiste o convenio asinado este xoves entre estas entidades e a Mancomunidade, para continuar avanzando no Programa, financiado pola Consellería de Emprego e Igualdade e cofinanciado polo ente local.
Así, unha vez finalizado o curso, no que participaron 19 candidatos e candidatas, o equipo de prospección do Plan de Emprego púxose en contacto con aquelas empresas que, no seu momento, solicitaran a posta a disposición de perfís de soldadura, debido á escaseza de profesionais neste sector desde hai anos.
Así, Rafonca, Grupo Incega e Padinsa Salnés S.L., empresas do sector, acollerán en prácticas a seis dos 19 usuarios e usuarias para que demostren as habilidades e capacidades adquiridas no manexo de técnicas de soldadura, que pasan polo manexo de arco con electrodo revestido MMA III, soldadura semiautomática manual EN- 135, ferramentas de trazado e corte procedementos de soldadura TIG 141 GTAW e inspección de soldadura, adquiridas ao longo das 80 horas de duración do curso. O persoal poderá estar ata un mes de prácticas con opción a ser contratados polas respectivas entidades.