Un estudo con esqueletos realizado por investigadores da Universidade de Santiago de Compostela (USC) en colaboración con centros de toda Europa revelou que a actividade mineira e metalúrxica da época romana xa causaba no seu momento contaminación ambiental que afectaba á vida das persoas.
Así o mostran, segundo recolle este traballo de investigación, os esqueletos enterrados na necrópole da Lanzada, onde se achan restos humanos por un período continuo de 700 anos, e que presentan diferentes niveis de metais nos corpos en función da súa antigüidade.
Nun comunicado, a directora do estudo, Olalla López Costas, expón que "a minería e a metalurxia masivas deses séculos reflíctense á perfección nos ósos das persoas que viviron nese ambiente contaminado", xa que arroxan niveis de chumbo e mercurio moi superiores aos procedentes da Idade Media.
Durante o período romano -engaden desde a USC- deuse un "clímax da contaminación atmosférica" procedente da intensidade destas actividades no noroeste peninsular, o cal demostra que estes efectos no medio ambiente "levan afectando á vida das persoas durante máis de 2000 anos".
O estudo, dirixido por López Costas e no que participaron os investigadores do grupo EcoPast Noemí Álvarez Fernández e Antonio Martínez Cortizas, foi publicado na revista Science of the Total Environment.