Ao redor de 40.000 persoas visitaron o recinto de Fexdega para acudir a algún dos eventos feirais celebrados no pavillón de Vilagarcía. Este dato foi exposto este venres polo alcalde, Alberto Varela, durante a inauguración dunha dobre cita que ten lugar neste escenario: a terceira edición de ExpoCasa e a segunda de Degusta Galicia. Son oitenta os expositores os que están presentes: 60 no primeiro e os 20 restantes no segundo, precisou Marta García, a organizadora de ambos.
Alberto Varela aproveitou a ocasión para recordar que esta actividade é posible pola aposta decidida do Goberno local, xa que achega o persoal e os medios técnicos en solitario -ao haberse retirado a Xunta de Galicia do padroado que xestionaba e administraba a Fundación Fexdega, logo de despedir ao persoal que contratara con esta finalidade- e dos promotores privados.
O alcalde subliñou que a aposta do Goberno local fixo posible que durante os catro últimos anos celebráronse unha media de entre trece e catorce eventos feirais, e Marta García cifrou en varios millóns de euros o investimento realizado no municipio polos visitantes. Varela agregou que unha parte do éxito estriba na xestión realizada polo edil de Promoción Económica, Juan Antonio Pérez Callón, que tamén acudiu ao acto.
O rexedor de Vilagarcía reiterou a determinación do Goberno local que afrontar o acondicionamento e a ampliación do pavillón coa finalidade de seguir compatibilizando o seu uso como escenario de feiras co de recinto deportivo e doutras actividades de carácter social.
Marta García afirmou que o empuxe dos promotores logrou o primeiro éxito, que estriba na recuperación da actividade e que Fexdega volva ser un sinónimo da cidade onde está situado o recinto. O seguinte paso será alcanzar o obxectivo de que suceda o mesmo no ámbito autonómico. ExpoCasa e Degusta Galicia estará aberto ata o domingo, de 11.00 a 21.00 horas.
