Axilizar o control das intervencións é un dos obxectivos da aplicación Gesparque, que o Grupo de Emerxencias Supramunicipal Sanxenxo utiliza no seu traballo diario.
Trátase dunha ferramenta moi intuitiva, que recolle as necesidades e os parámetros cos que traballa un parque de bombeiros, desde o informe dunha intervención ata o inventario de material ou a elección da mellor ruta para acudir a un operativo.
"É unha aplicación que ten moitas posibilidades e que nos permite un control absoluto do servizo e o abandono case definitivo do papel", explica Antonio Folgada, xefe de servizo de Emerxencias Sanxenxo.
Cada equipo de bombeiros conta cunha tablet na que introduce os datos de cada intervención desde o momento que recibe a chamada ata que se conclúe o servizo, de forma totalmente dixital, creando un arquivo con todos os apuntamentos relevantes da actuación. Pero tamén inventaria todas as subministracións e materiais do parque e o estado dos mesmos, xerando unha alerta coa información, en tempo real, a través de incidencias e cambios de estado. "Pode incluso advertirnos da caducidade dun extintor ou dunha avaría dun vehículo e o seu estado", sinala Folgada.
Actualmente están a ser incorporados os datos para elaborar un mapa da infraestrutura nos concellos onde actúa
Nestes momentos, está a ser ultimada a introdución dos datos para elaborar un mapa dixital do estado e da resposta do servizo a través dun sistema innovador.
Inclúe tamén información de puntos hidrantes nos municipios onde actúa, así como plans de prevención e planificación ou puntos de interese dos edificios municipais para actuar en caso de urxencia.
ÁMBITO. Doutra banda, este servizo foi reforzado hai dúas semanas coa incorporación de dous equipos de rescate formados por capucha, máscara e botella, para actuar en caso de evacuación nun incendio e evitar a intoxicación por fume das vítimas.
Actualmente, o persoal do Grupo de Emerxencias Supramunicipal de Sanxenxo está formada por 19 traballadores, e o seu ámbito de actuación tamén de abarca os municipios do Grove, Meaño e Poio. O custo anual do servizo rolda os 550.000 euros e o investimento municipal é de máis de 400.000. O resto de orzamento procede da Xunta de Galicia e da Deputación de Pontevedra.
