O Concello de Sanxenxo deu onte a coñecer os datos das 3.296 intervencións nas que tomou parte a Policía Local, correspondentes á actividade da rúa municipal e denuncias por infraccións de tráfico, botellóns, ruídos ou expedientes por realizar necesidades fisiológicas na vía pública.
No que respecta á retirada de vehículos mal estacionados, o mes de agosto volveu ser o de maior actividade. Só entre os días 1 e 31 engancháronse' 256 automóbiles. Seguiulle xullo, con 104; setembro con 59, e xuño, con 17. Os datos recollidos no informe fan mención á franxa que vai desde o inicio da tempada estival ata o pasado 11 de setembro. En todo caso, a Policía Local detecta un descenso de aparcadoiros indebidos, tendo en conta que o total de vehículos retirados foi de 436, por 444 correspondentes ao mesmo período do ano pasado.
MENOS BOTELLÓNS
Outro cabalo de batalla para os axentes do corpo de seguridade municipal durante este verán foron os botellóns clandestinos. Neste caso, o Concello percibe un descenso notable desta actividade, prohibida desde fai máis dunha década. Se en 2018 tramitáronse máis de 200 denuncias por esta infracción, nesta ocasión sancionáronse menos da metade (85).
Para rematar, a Policía Local 'cazou' a 273 persoas realizando as súas necesidades en plena rúa, algo que tamén está castigado con importantes multas económicas. Cabe recordar que a Administración municipal contratou a 33 auxiliares para reforzar o servizo de seguridade durante os meses de verán. Seis deles continuarán ata decembro.
