Funcionarios da Policía Nacional adscritos á comisaría provincial de Lugo puideron identificar unha muller de 28 anos, veciña de Lalín, por un delito de estafa, consistente no aluguer fraudulento dunha vivenda en Sanxenxo.
Os axentes recibiron unha denuncia polo aluguer dunha vivenda vacacional na localidade pontevedresa, onde esta muller arrendaría a vivenda, que non é da súa propiedade, utilizando fotografías obtidas en internet.
O inmoble foi alugado por 1.150 euros, un importe que a vítima abonou en tres pagos, logo de recibir a documentación que presuntamente lle daba dereito á utilización do inmoble. Unha vez no lugar e coa intención de gozar das súas vacacións, deuse conta de que fora vítima dunha estafa.
Os investigadores comprobaron que a presunta estafadora xa realizara máis actos similares co mesmo modus operandi. Por todo iso, deuse traslado do ocorrido ás autoridades e corpos policiais correspondentes, para proceder á localización e posta a disposición xudicial da autora dos feitos.