O Concello
Como vén reclamando desde hai anos, a Administración local pide de novo que se prohiba o desembarco de persoas no illote sen a correspondente autorización da Consellería de Medio Ambiente. Tamén solicita o control do fondeo de embarcacións, motos de auga e do número de visitantes, mediante un plan de usos. Ademais, subliña a necesidade de facer valer os dereitos que ten a confraría sobre a concesión marisqueira da zona.
O Goberno local denunciou que, durante o confinamento, non faltou quen se saltou as normas e se desprazou ao Areoso para darse un baño. E a pesar de que o Concello avisou á Xunta -a administración con competencias na materia-, non obtivo resposta algunha e a situación prolóngase durante os meses de verán, coa consecuente progresiva degradación ambiental do illote.
A Administración local e diversos colectivos ecoloxistas, veciñais e culturais advirten de que o illote está a sufrir durante os últimos anos unha gran presión, derivada do turismo incontrolado, que está poñendo en perigo a conservación da flora e a fauna e dos xacementos arqueolóxicos situados neste espazo.
A estas problemáticas engade que o "perigo da desaparición do illote vai en aumento, debido á subida do mar, polo cambio climático e a de substrato nos seus fondos, convertidos nun aparcadoiro de motos e iates, onde parece que todo vale", expón a concelleira de Medio Ambiente, Gabriele von Hundelshausen.
E outro referente ambiental da Illa de Arousa, o parque natural do Carreirón tamén "acusa a falta de interese, investimento, mantemento e vixilancia por parte da Xunta, mais tamén a falta de concienciación e respecto por parte dous seus visitantes", subliña a edil.